Ambasadorët, takime intensive me anëtarë të Kolegjit Zgjedhor

Topi: Gjyqtarët të respektojnë statusin e tyre

Vetëm katër ditë para vendimit “historik” të Kolegjit Zgjedhor për rezultatin e zgjedhjeve në Tiranë, ky institucion është kthyer në qendrën e vëmendjes së faktorit ndërkombëtar. Burime diplomatike kanë bërë të ditur për “Shqip”, se dy nga ambasadorët, përbërës së trojkës diplomatike, kanë zhvilluar takime individuale me anëtarët e Kolegjit Zgjedhor. Burimi që bën të ditur faktin, nuk jep detaje të hollësishme për bisedimet, por natyrisht tema ka qenë mbështetja e fortë që faktori ndërkombëtar u jep gjyqtarëve të Kolegjit për të dhënë drejtësinë në vendimin e tyre të 3 qershorit. Informacionet për këtë zhvillim kanë qenë të kujdesshme edhe për emrat e ambasadorëve, për të cilët burimi diplomatik vetëm sa “lokalizon” paksa situatën, duke bërë të ditur se “dy nga tre pjesëtarët e trojkës” kanë qenë të angazhuar me takimet e këtyre ditëve me anëtarët e Kolegjit Zgjedhor. Pikërisht mosbërja publike e këtyre takimeve tregon më shumë mbështetjet që i është dhënë nga ndërkombëtarët institucionit që pritet të vendosë për Tiranën, sepse një rast tjetër do të komentohej nga qarqet politike, duke ndikuar më shumë në vendimin që pritet të jepet ditën e premte. Në deklaratat e tyre të disa ditëve më parë, ambasadorët më të rëndësishëm të Perëndimit në Tiranë kanë bërë të ditur se politika nuk duhet të bëjë presion mbi anëtarët e Kolegjit dhe të gjithë duhet të pranojnë rezultatin që do të japë kjo trupë gjyqtarësh.

Topi

Një tjetër apel i radhës në mbrojtje të pavarësisë së Kolegjit, ka ardhur edhe nga Presidenti i Republikës, Bamir Topi, i cili nga Vlora ka shprehur mbështetjen për institucionet e pavarura.
Topi, nga Vlora ku mori pjesë në një stërvitje të përbashkët ushtarako-detare të NATO-s, deklaroi se Kolegji Zgjedhor duhet të japë një vendim të drejtë, në përputhje me ligjin. “Shqipëria s’është vend pa ligje. Ligjet janë, problemi është te zbatimi. Çdo institucion e çdo individ që ka në dorë një proces të caktuar, që janë shumë të rëndësishëm, pasi japin një notë për demokracinë, duhet të kuptojë se është ligji dhe vetëm ligji”, pohoi Topi. “E kemi thënë vazhdimisht dhe duket se po e përsërisim. Nëse gjithkush është në rregull me ligjin, Europa do të dijë të vlerësojë”, theksoi ai. Kreu i shtetit nënvizoi për herë të parë edhe se gjyqtarët e Kolegjit duhet të respektojnë statusin e tyre kur të vendosin për Tiranën, që lidhet me integritetin moral, profesional dhe ligjor. “Nuk jemi në atë situatë kur një institucion epror do të flasë në emër të të tjerëve, jo. Do të flasin vetë ata, është statusi i tyre ligjor dhe moral. Të gjitha këto japin standardin e arrirë”, u shpreh kreu i shtetit shqiptar. Presidenti Topi e ka theksuar çështjen e zgjedhjeve, duke kujtuar standardet për integrimin në BE. “Në radhë të parë duhet thënë që është një sfidë e institucioneve dhe institucionet në një vend demokratik, siç është Shqipëria, prodhohen nga politika. Institucioni i parë është institucioni i zgjedhjeve”, deklaroi Presidenti i Republikës.